ღვთისმშობლის სახელობის ეკლესია დგას სოფელ ტანძიის სამხრეთ დასავლეთ კიდეში (41.449478, 44.364160). იგი 1680 წელს აუგია სომხითის მოურავს, საორბელოს პატრონსა და საბარათიანოს დიდ თავადს, პაპუნა ყაფლანიშვილს (სულხან-საბა ორბელიანის ბიძას), მეუღლესთან ერთად.
ეკლესია დარბაზულია, ნაგებია ნატეხი ქვითა და აგურით. დასავლეთიდან მიშენებული აქვს სამრეკლო. ტაძარს შესასვლელი სამხრეთიდან და დასავლეთიდან აქვს, სარკმელი კი, დასავლეთის გარდა, ყველა კედელშია გაჭრილი. აფსიდა ნახევარწრიულია.
ტაძარს ორი მნიშვნელოვანი წარწერა აქვს, რომელთაგან ერთი აღმოსავლეთ კედელშია ჩადგმული, მეორე კი – დასავლეთი კარის თაღზე.
ეკლესია რესტავრირებულია, 2006 წლიდან კი იგი კულტურული მემკვიდრეობის უძრავი ძეგლია.
